高雄國際馬拉松～超半馬(報名篇)

2011年11月尾無嗱嗱俾我發現2012年2月5日高雄有國際馬拉松賽，而且仲未額滿，仍然接受報名。我計過我仲有4、5日大假要於4月前清假，似乎時間上好fit喎；加上大會有一項「超半程馬拉松」項目 (即係跑24km)，啱哂我呢ｄ想突破半馬，但又無信心跑全馬的人啦！

2012年「高雄國際馬拉松」與「香港渣打馬拉松」同日舉行，所以上兩次陪我傻吓傻吓去海外跑的好友今次不能陪我癲了……唯有我自己一個人去啦！

今次高雄馬拉松之旅將會是我人生的一次創舉，包括：

第一次一個人去旅行

第一次去台南(高雄)旅行

第一次參加「超半馬」項目(跑24km)

第一次參加海外「超半馬」項目

亦將會是我2012年第一次跑長跑

估唔到一個小小的參賽決定，竟會造就我生命中的多個第一次。可算是人生的一大突破！

不過，原來要突破自我絕不容易，且要付出頗大的代價～

單是報名已經難關重重：

雖然說是「高雄國際馬拉松」，但一點也不國際化，佢甚至連報名費也不能在網上支付。那網站又寫得唔清唔楚，叫人報名後去7-11便利店的 iBON機 登記付款，那機只有台灣才流行，香港的7-11根本無呢樣嘢！

	於網路報名結束後請列印繳費證明至7-11利用IBON系統繳交報名費。請確認報名事項無誤，一經報名後即不接受報名事項更改，使用7-11  IBON系統繳費者，建議於線上報名取得繳費序號後盡速於報名截止或額滿前完成繳費動作，未完成繳費者視同未報名成功，如遇人數額滿，無法再進行繳費。 ※ 7-11超商i-bon繳費流程： 線上報名網站登錄，完成報名後，取得1個i-bon的繳費代碼(訂單編號) → 憑此代碼至全省7-11超商門市 → i-bon機器螢幕點選『繳費』 → 選擇『虛擬帳號』 → 輸入廠商碼『TPE2012』 → 輸入您的繳費代碼『AA000000123456』(共計14碼) → 輸入您的『聯絡電話』(即網站報名所留的手機號碼) → 選取及確認您的『繳費項目及資訊』 → 『確認，列印繳費單』 → 三小時內持繳費單至櫃檯繳費。

 唔理喇，就快deadline(5/12)，報咗名先算啦！

原來遞交報名資料後，網頁才會顯示海外人士可以將報名費存入一個台灣的戶口，然後傳真存根給主辦機構。

  吓～入台幣去台灣的銀行？我咁大個女都未試過匯錢去外地喎！

由於台幣並不是國際貨幣，所以某些銀行(e.g.中銀)沒有匯台幣的服務，即使有這項服務旳銀行也需要收手續費及兌率費，計計埋埋仲多過我要匯的報名費。

但係唔知點解，咁鬼麻煩我都仲去搞？真係低低地……!!!

最後我就傻吓傻吓咁將我人生的第一次海外匯款經驗(及高昂的手續費)奉獻咗俾呢個賽事！

估唔到問題仍未解決～

官方網站原來無講到入錢後要fax存根去邊，只係話報名者若於4日內未繳付報名費，大會將取消其報名申請。

我唯有查主辦單位(中華民國田徑協會)的資料，雖然查到協會的傳真號碼，不過那是台北的辦事處傳真，都唔知係唔係fax去果度?!!

另外，我無傳真機可以fax去外國喎!

本來我可以托家姐用公司的傳真機fax去外國(之後俾番長途費佢公司)，但剛巧佢果兩日唔返公司，幫唔到我fax！

最後我幾經辛苦，終於在網上搵到一些網站可以經電腦免費fax去外國myfax  &  pamfax。困難重重之下，終於完成了海外傳真！

不過，一來自己找來的傳真號碼都唔知係唔係正確；二來又唔知對方係唔係會收到。

穩陣起見，我send咗個e-mail俾主辦單位，希望是但一個途經可以遞交到我俾咗報名費的證明啦！

過咗兩日，我再上大會網站check我報名的狀況，點知仍然係顯示我未付款。

過埋指定日期後，大會更當我沒付款→取消了我的報名申請。

唔係掛!!!???真係取消咗我的申請?!!! 我明明俾咗錢o架喎！
唔通真係唔係fax去那個number?

大會網站post出最新消息：超半馬只餘250個名額。

於是我嗱嗱林再次報名(霸住個quota先)，然後又再次傳真及電郵給大會。

整個過程同上次一樣，連結果都一樣----- 過咗某個指定日期後，佢都係當我無付款，取消了我的報名申請。

唉～算啦！可以做的我已做哂，不能成功報名便算了！經一事長一智，今次經歷都學到唔少嘢，總算是一次很新鮮的人生經歷丫，那幾百元報名費就當係交學費吧，不過就貴咗D……

最後，我再send email俾主辦單位投訴，要求對方如果不接受我的申請便應退回我的匯款。

過咗幾日，竟然收到大會的電郵回覆說會查核我的入數紀錄，應該沒有問題。

翌日，他們便回覆說：經查核，我的報名申請已被接納，並已於網上更新了我的申請狀況。

噢～官方網站終於顯示我的報名狀況是「已繳費」！

幾經辛苦，昨日(5/1/2012)終於收到大會電郵給我的"回執單"(即領取跑手包通知書)，這刻才真正確定大會接納了我的參賽資格。
搞咁多嘢才報到名，真係有D後悔報名參加「高雄國際馬拉松2012」呀！
原來問題陸續有來，依家洗濕咗個頭，唯有以跑馬拉的堅毅精神繼續完成餘下的預備功夫啦……

待續…