東京馬拉松之旅~Day 5 (箱根-->富士五湖)

(2011.03.01)

終於來到東京之旅的第五天了！
今日我們便要離開箱根，真係好唔捨得呢間咁大嘅酒店"套房"同埋個超近便的溫泉場。
離開前，一定要浸多次溫泉！橫豎都睡得唔好，所以我爭取時間一早(約6:30am)便起床再去浸溫泉。係呀！短短三日兩夜的住宿，我一共浸咗五次溫泉呀！

由於我哋要趕搭巴士去「御殿場駅」，再轉坐2小時巴士去「富士五湖」，所以昨晚已一早同酒店預約定迎送車，9:00am載我們去強羅駅。Check out後便向一下站富士五湖進發......

(呢架就係第一日嚟到箱根忽然在車站出現接我哋去酒店的迎送車了)

(當日我哋就係憑車身的酒店名認出呢架車了)

(告別酒店車後，我哋就首先坐巴士去"御殿場駅")

(呢架巴士可以直接去到御殿場アウトレット=outlet。御殿場分開 Outlet及 駅兩部份；outlet係俾人shopping的地方，並唔係我哋要去的"御殿場駅")

(所以我哋首先要坐巴士去"仙石"，再轉車去"御殿場駅")

(呢度就係中途轉車去"御殿場駅"的仙石站喇！初時我仲以為我哋miss咗班車要等到下午才有車，後來婆婆教我睇站牌最底那個時間表，才知原來我哋無miss到班車，好彩！)

(終於順利轉搭另一架巴士去"御殿場駅"了)

(到咗"御殿場駅"，我哋又要搵另一架長途巴士去"富士五湖")

(要上樓梯，過咗橋的對面才去到巴士站)

(Thanks God! 順利俾我哋搵到"御殿場駅"的長途巴士站)

(因為我哋有箱根的Free Pass，所以唔使買車票)

(我哋搭11:10am那班車去富士五湖之一的"河口湖"駅)

(等陣就係响呢個--2號站 上車)

(既然車未到，去探吓個厠所先，富士山口トイレ＝富士山Toilet)

(去完厠所出到嚟，見到一個富士山形的觀光地圖，好有特色喎！)

(仲有時間，所以四圍行吓。噢～ 第一次見日本的髮型屋，呢間係for男仕)

(呢個係女士專用的髮型屋，カット＝剪髮，要1575円)

(因為呢度唔係御殿場Outlet，所以都無乜好行，我哋又返回巴士站)

(呢度又凍又大風，入候車室等好過啦！)

(巴士嚟喇，出發去河口湖駅了)

(坐咗大約2小時車，終於到達河口湖駅了)

(呢個車站都幾有特色，有好多小精靈鎮守住o架)

(由於呢度海拔較最，所以都幾凍吓，依家只得1.3°C咋)

(好彩今次我哋間旅館好近河口湖駅，唔使10分鐘我哋就去到酒店check-in了)

(酒店叫"河口湖Station Inn"，連個Logo都有火車標誌，so cute!)

呢間酒店真係唔錯，值得向大家推介，因為......
一) 佢好近車站(步行5mins)；
二) 佢差唔多係同區最平，¥4200/person/night (三人房，不包早餐)；
三) 佢服務一流，我哋的房間在二樓，職員會替我們拿行李上房；
四) 酒店房內有免費WiFi；
五) 即使你無電腦，佢都有一間Free Internet Room提供免費上網服務，那裡仲有免費奶茶、咖啡提供添！

六) 佢仲同隔離一間食店&手信店有聯繫，住客到那裡食嘢或買嘢都有95折。
七) 佢雖然無溫泉浸，但係佢都有一個小小的展望風呂場　(稍後的blog會再介紹展望風呂場的環境)

不過，唯一美中不足的是--這間旅館的房間面積很細，房內沒有廁所，刷牙洗面就有少少唔方便。

(フロント＝Front即旅館服務台，呢度有ｄ景點入場券的coupon可以免費索取)

(我哋間房响二樓，但係旅館無lift，好彩職員哥哥幫我哋搬行李上房)

(呢間就係我哋酒店房，一眼見哂咁大，同箱根的"套房"差好遠！)

(由間房望出去可以見到車站，如果好天仲可以見到富士山添)

(咦，Woodstock發現一個無掣的電話，唔知點用嘅呢？不過都係唔好亂搞喇，費事又整響個警鐘啦！)

Settle Down後已經差不多1:30pm了，係時候去食lunch。我哋首先去番車站度買張Free Pass 呢兩日遊覽搭車用，然後去祭五臟廟，跟住就展開富士五湖--河口湖的遊覽行程了！

(河口駅內有得買巴士free pass)

(呢張就係呢兩日用來搭車的Free Pass了，可以當明信片用o架！)

(車站內仲有my favor -- 紀念印 添)

(終於開餐喇！我同Bonnie都叫咗"醬爆漢堡定食"--680円/set

(Silver叫咗そば+飯團餐，都好似好吸引喎)

(食飽飽後，第一站去-- 河口湖音樂盒之森博物館)

(有free pass, 當然要善用嚟搭巴士啦)

(唔使廿分鐘就到了"河口湖音樂盒之森"博物館)

(如果好天，裡面真係會好似呢個牌影得咁靚......)

(點解ｄ雨雲會由箱根一直跟我哋來到河口湖o架？好彩呢度都好似"小王子博物館"咁有雨傘免費借俾遊客用)

由於呢個博物館都幾大幾多嘢睇，所以留番下一篇Blog才講！

待續......