剝智慧齒

早前引起香港市民議論紛紛的話題：財爺派的$6,000點使好呢？

我根本完全不在意那筆錢可怎樣花，因為根本都唔知政府會點派、會幾時派……

估唔到ｄ錢都未到手，我便要花掉這筆錢了！

******

(以下內容可能引起大家情緒不安 ，敬請家長陪同子女觀看)

事緣上星期去了洗牙，忽然牙醫問起我的智慧齒有沒有痛？
早兩年智慧齒確實不時引起痛楚，但近大半年已沒有痛了。

之前有另一牙醫話那隻智慧齒藏得太深，所以佢拔唔到；後來問依家呢位牙醫，佢當時亦話隻牙太近神經線，如果不是太痛就不建議郁佢。

唔知點解今次洗牙佢竟然主動問起那隻牙呢？
於是再照一次X-ray看看那隻牙的近況，底片中看到那隻牙仍安然躺在牙肉內，但它與前面那隻大牙之間卻有一些黑影，他怕那隻牙會在牙肉內吽爛，故建議我趁後生動手術拔掉它。

(因為X-ray唔俾帶走，所以我憑記憶畫番出嚟)

我心想，那隻牙打橫瞓咗響度，唔知第日會唔會向前生頂到ｄ大牙?又唔知會唔會自己在牙肉內吽爛? 拔掉它，除去那個計時炸彈都係好嘅！

由於那隻牙的位置太近神經線，所以開刀前要先照另一張X-ray，瞭解神經線的分佈，那張片照一照要成$1,500！咁貴?!! 而手術費則要$4,500，合共盛為$6,000.！

咁啱係$6,000?!! 唔通 主耶穌怕我亂咁使財爺派的$6,000，所以錢未到手就幫我安排點使！

算啦，從另一角度看，有財爺的$6,000幫補吓，唔使我惆悵點樣慳錢找數。於是便預約了今天(21/3/2011)去剝智慧齒。

今次係我第一次做手術，亦都係我第一次剝智慧齒，所以事前都有點擔心 。加上隻牙的位置，如果手術有咩差錯，弄傷神經線，好可能會導致永久失去味覺或影響說話能力，咁就真係無嗱嗱整條疤！

唏～既然決定咗剝，就唔好胡思亂想擔心咁多啦！唯有將顧慮交俾 主啦！

今早我準時11:00am到牙醫診所，牙醫問我有心理準備未？我話：食咗早餐算唔算有準備呀？佢話：識講笑即係準備好啦！

於是便開始手術，他幫我打了三枝麻醉針，之後我的口腔便失去知覺，只聽到儀器的"V" "V"聲。跟住聽到佢同護士講：隻牙冠大過個窿添，拔唔出！

感覺到佢好用力咁拑隻牙，但都唔成功。之後佢同我講，等陣你會聽到”啪”一聲，不過你唔使驚，因為我會切開你隻牙，分件取出。
不久，我唔係聽到”啪”一聲，而係聽到”噼噼啪啪”幾聲。我心諗，係唔係成牙碎哂呢？會唔會整到條神經線呢？心裡開始默默禱告(我根本開唔到聲)......

接著的十多分鐘，只feel到醫生努力地(用力地)扯隻牙，又聽到他自言自語說，好大隻牙冠呀 ！
大約過了大半小時，他終於說一句：OK！依家只淨番牙腳要取出來，只需幾分鐘手術便完成了。
果然，過了幾分鐘他便開始幫我縫針。整個手術花了一個半小時，真係辛苦哂 ！

(牙醫要將成隻牙切成三份才可以順利拔掉)

手術完畢後，由於麻醉藥未過，我只感到右邊麻痺。記得以前細路仔時代剝牙後都會有雪糕食，所以我回家前都去咗買雪糕。回到家後，麻醉藥力消失，便感到傷口的痛楚。好痛呀！要拿拿聲食止痛藥先得頂得住！

傍晚時右邊臉頰仲愈來愈腫添！明明近排隻牙都無痛，無嗱嗱搞到自己鬼咁痛添！呢兩日仲只係可以食流質食物，真係“Law Lee Jean”…… ！

不過，剝咗隻智慧齒一勞永逸都係好嘅！希望唔會有任何後遺症，同埋快ｄ唔再痛 啦！

多謝好朋友們為我這次剝智慧齒的手術待禱，使手術順利完成！

感謝主在我身邊安排了不少小天使關心我！更有朋友知道我要支付高昂的手術費，主動資助我部份金額 (係俾錢我，唔係借錢俾我)。雖然我沒有收到，但對朋友的慷慨及關懷深深感動。希望它日假如我真的在經濟上有困難時，那位朋友仍會仗義相助啦！

四葉妹妹：唔知阿Sue幾時再剝牙，咁我哋又可以有雪糕食嘞！

我：😠作死你呀～ 為咗食雪糕而想我剝牙！