高雄馬拉松之旅～Day 4 (完結篇)

2012.02.07～Tue.

完結所有行程，是時候出發去機場了。

由於捷運卡已沒有餘額，而每次增值至少NT$100，但由高雄去機場只需NT$35，故我最後的這程便買單程票～

(捷運的單程票是一個膠coin，只需掃一掃感應區便可入閘去月台，出閘時將膠coin投入機內便可)

 (膠coin一面印有單程票字樣，另一面是印有捷運的logo)

(到達高雄國際機場的捷運站，當然要蓋番個紀念章啦)

大約25分鐘便到達機場站，雖然高雄機場沒有台北機場咁大，但機場內都好多嘢睇～

(高雄國際機場唔算大，不過裝潢及設備都不俗)

(呢度有個大佈景板，俾人影相留念及蓋紀念印)

(買唔夠手信仲可以嚮呢度補給添)

(回程都係坐中華航空)

行了一陣便夠鐘check-in，本來我打算好似來台灣時那樣不寄運行李，但櫃位服務員話呢班機是細機，而我的喼超過5KG不能hand carry，所以只好寄運啦！

過關入境後，尚有2小時才登機，我當然帶埋四葉妹妹周圍行，八掛吓啦！

雖然呢度唔似得台北機場咁有個Hello Kitty候機室，不過都有幾多嘢睇，一ｄ都唔會悶；不經不覺便到了登機的時候了～

(過關後便見到免稅店及不少名牌店)

(當然唔少得手信店，俾離境的遊客作最後衝刺啦！)

(我都唔執輸，買了一個鳳梨酥造型的磁貼做手信)

行完店舖，繼續周圍逛，帶四葉妹妹佢哋四圍影吓相～

(呢度有個小朋友corner，播緊卡通片)

(草菇櫈～ 好 cute 啊！)
 

(雖然無Hello Kitty，但係有史力仔)

(嘩！呢度仲有免費按摩椅服務，好體貼啊！)

(估唔到台灣都係一個宗教自由的國家，這裡有不同宗教的祈禱室給旅客上機前安靜心靈)

(另一處設有免費上網服務，真係不愁寂寞呀！)

(雖然係室內，但係都有一個花園，ｄ花係真花嚟o架)

 

(今日都未食lunch，嚮呢個靚靚小花圃食少少嘢才上機)

(等陣就係坐華航機回港了)

(話咁快就夠鐘登機了)

(呢架機係細機，所以無電視睇)

(好彩mark到個窗口位)

(起飛後，窗外的雲海令我&四葉妹妹目不暇給)

(飛行時間只是一小時，但由於飛行中途遇氣流，故延遲了20分鐘才派餐，所以我只得十多分鐘時間用餐)

(終於順利到達香港機場，並取回寄運的行李)

以往返港後我都是坐巴士由機場回家，但今次因為有其它地方要去，故選擇了坐機鐵再轉乘地鐵。這次係我咁大個女第一次坐機鐵！
一去到月台就見到有車，由於班次比較疏(15分鐘一班)，故我嗱嗱聲影張相便入了車廂。上車後我當然又係扮哂遊客咁周圍拍照啦。
中途我忽然諗起，我好似無買車票，亦好似無需拍卡過閘就入到月台喇喎?!

好彩我係香港人，有八達通卡！奇怪～當我去到青衣站轉港鐵時，一拍卡，佢竟然知道我係由機場過來，扣我HK$60!!

如果我是外國遊客，無買票又無八達通，咁點出閘呢??

(第一次坐機鐵，當然要影番張相啦)

短短4日3夜的旅程便造就我人生的多個「第一次」 ：

 第一次一個人去旅行

 第一次去台南

 第一次參加「海外超半馬」項目

 報名「海外超半馬」時，第一次匯錢去外國銀行。 (手續費好啊！)

 第一次坐香港的機場鐵路

雖然好多人一早已經歷過以上的事情，沒甚麼特別；但在我來說：第一次就係第一次，每件事都令我難忘，充滿新鮮感、充滿喜悅！

當然若不是藉著那加給我力的 主，我什麼都不能作！
祂在適當的時候便會為我提供幫助，令整件事得以圓滿順利完成！

感謝 主為我安排了這一次奇妙之旅，豐富了我的人生，讓我經歷 神的大能！

記得上年跑完「東京馬拉松2011」回港後一星期，日本便發生世紀大地震。

估唔到今次跑完「高雄馬拉松2012」回港後不夠一個月，台灣便發生地震！幸好今次沒有造成太大的傷亡情況～

 (新聞來源am730)

又一次感謝 主，讓我免於災難！

其實幸福並不是必然，機會亦不會時常出現；所以有甚麼事想做，便不應遲疑、不要等待明天了！(當然想做的事是指正確的、不傷害他人的事啦)

～完～